Deelnemers 2025

Zô’n 2x11+1 jaor geleeje ôntstông in MFA de Koppel in Deetere 't idee öm 'n zaate hermenie op te richte. 't Resultaat: Zaate Hermenie Jonk Vleisj oët Deetere! De naam verwiest nao de jonge laeftiëd van de leeje, destiëds tösse de 14 en 16 jaor aod. 

Mèt get partieje van collega-hermenie De Plekselpöt en zelfgemâkte medailles van beërviltjes en zilverpepeër trokke ze in 2002 vur 't iërs mei in de groëte optoch van Deetere. Zoë hebbe ze talloze Vastelaovesoptochte, zaate hermeniekes treffe en zellefs optrejes beej Rowwen Hèze, TVL en L1 op eur naam staon. Mâr de absolute hoëgtepunte? Det ware de euverwinninge op 't LKZH in 2009 en 2014!

Ze zien baeter bekind as 'de Joekskapel' of 'Zônger Drank Geine Klank'. Ze zien sûnk (sinds) 1989 aktief in de Baeker en Brachter vastelaovend. Eure naam is door ein van de oprichters in 1989 bedôch. Of dit iets mèt eur drankgebroëk (destiëds) te make haet, laote ze in het midde.

Beej eur optrejes is de nuüdige drank altiëd van de partiej, want... zônger drank... geine klank! Joekskapel Zônger Drank geine Klank won 't LKZH in 2005!

Sûnk (sinds) 2010 zien ze aanwezig op 't LKZH. De in 't zelfde jaor opgerichte zaate hermenie (samevoegsel van diverse leeje van de 'Zösterse' (Susterse) Hermeniekes) bestèt inmiddels oët ruüm 3x11 leeje. 

In die vieftiën jaor is d'r neet vuül verangerd; instrumente die veur 'n rippetisie nag gezoch môtte waere, de volumeknoep altiëd oppe hoëgste stand, note die nag stiëds neet gelaeze kinne waere, nag stiëds 'opgerek mer neet gesjeurt' en nag altiëd miër zaät as hermenie! As ein van de grôtste hermeniekes hope zeej d'r wèr 'nne geweldige aovend van te make!

Mèt nog miër enthousiasme en dôrs as vörrig jaor reize ze dit jaor aaf richting MAASBREE! Neet allein 't geneete van tig zaate hermeniekes stèt eur aan, ok 't veuroëtzich van blaoze vur 'n volle zaal duit eur hârte sneller kloppe. Rek 't Neet Den Sjeurt 't Waal oët Zöstere!

Neuge Pils en Eine Sjoes is 'n kepel oët Einekoeze (Einighausen). Deze groep is in 2010 opgericht door 'n 10-tal leeje van Fan­fare Con­cor­dia Einighausen. De naam is aafgeleid van de favori­ete bestelling van dees 10 leeje. De 10 muzikan­te richt­te de kepel op öm muziek te kom­binere mèt plezeer. Oët­er­aard heije ze dit ok al bin­ne de fômfaar (fanfare), mâr ze woeje dit nao 'n anger niveau tille, mèt gezel­ligheid veurop. Vanaaf de iërste rippetisie zoot de gezel­ligheid d'r al drek in. Det resul­teerde in 4 extra persoëne oppe bühne beej eur iërste optreje.

In 2012 hebbe ze vur de iërste kiër deilgenome aan 't “Limburgs Kampioenschap Zaate Hermeniekes”, oftewal LZKH, destiëds geor­gan­iseerd in Nieuw­stadt. Öm vur zô'n groët en enthousiast pub­liek op te tre­je waas vur eur 'n geweldige ervar­ing. En det waar reeje öm ok in 2013 wèr deil te neme aan 't LKZH, nouw georganiseerd door de Sjpeknekke oët Boukoul. Heej is Neuge Pils en Eine Sjoes as winnaar oëtgerope, wat d'r veur zorgt dat ze zoewal Einekoeze (Einighausen) as ok de kepel op de kaart hebbe gezât in Limburg. 

De bestelling is inmiddels verangerd, mâr de gezelligheid stèt nag altiëd veurop beej deze aod-winnaar, Neuge Pils en Eine Sjoes! 

Vanoët 't hârt van Venlo (Vènnel), woë de Vastelaovend deep geworteld is, schittert Joekskepèl Och Nae Toch! Deze bruisende formasie, opgerich in 2009 door 'n jeugdige vriendegroep van hermenie St. Caecilia oët Bliërik en Waterscouting Venlo, is 'n waore sensasie. Woë de waterscouting zorgde vur de ônvervalste "joeks", vulde de hermenieleeje de muzikaliteit in. Ondanks eur relatief jonge laeftiëd (de leeje zien tösse de 26 en 36 jaar), hebbe ze 'n indrukwekkende geschiedenis opgebouwd. 

Ze hebbe veer kiër deilgenome aan 't prestigieuze Limburgs Kampioenschap Zaate Hermeniekes (LKZH), begeleidde Sinterklaos al dreej kiër beej zien aankoms in Venlo (Vènnel), Bliërik en Uerdingen, en zien 'n vaste waerde in de optochte van Jocus en de Wortelepin, dök mèt 'n groep van zô'n 40 vriende die vur eure wage meilaupe. Joekskepèl Och Nae Toch! is ok bekind van eur eige aanstaekelikke nummers as "Polsbendjes" (det zellefs op L1 radio te huüre waar) en "De bonne zien te deur!", die jaorliks 'n plekske verovere in de Vastelaoves Top 555. 

Mèt eur jubileumvieringe die 'n groët fiës zien mèt diverse joekskepelle en artieste, en eur onmiskenbare enthousiasme, stèt Joekskepèl Och Nae Toch! garant vur pure Venlose Vastelaovesvreugde en 'n onvergaetelikke belaeving!

Geschape🐑 in 2015 in de krochte van 't paradiëselikke Beeg (Grevenbicht) make de (b)engels van Nuchter Vertroch 't publiek in 'n optreje van 11 minute van god los. Verwach hemelse toëne die dich laote zweve, aafgewisseld mèt helse klanke die dien trommelvlieze in veur en vlam zette en dich mösschien wal vleugels… of hoorns… bezorge.

Van zachte wolkenflarde wies donderslaeg en duüvelse riffs: Nuchter Vertroch schakelt in 'nne augwènk van 'n moment van bezinning nao 'n inferno vol brandende energie. 't Eine moment zweefse op 'n roze wolk van saxofoonklanke, 't volgende steise/stèsse midde in 'n muzikale veurzië (vuurzee) van duüvelse trombones en tuba’s.

'n Hemelse, goddeloze show die se neet zals vergaete: 11 minute muzikaal geweld, krachtig en veuriger den de hel, mâr zoe betoverend desse opstijgs nao de zevende hemel.

Mis 't neet en kom tot bezinning tiëdes 't optreje van aod-winnaar (2016) Nuchter Vertroch op 22 november in Maasbree! 

Op 1 april 2016 (gèn grapje) woor Zaate Hermenie "Mörge Geit Baeter!?" opgerich. In Born ôntbrook namelik 'n aktieve Zaate Hermenie. Al langer heije ènkele leeje van Hermenie L'Union planne öm 'n zaate hermenie of kepel op te richte. Angere leeje wore geënthousiasmeerd en zoe ontstông Zaate Hermenie "Mörge Geit Baeter!?" 

In 2017 woor d'r vur 't iërs deilgenome aan 't LKZH, mèt suukses. Beej de iërste deilname in Grevenbicht woor al drek de 3e priës in de wach geslèpt en in 2018 noom MGB 't kampioenschap mei nao Born. 't LKZH in 2019 in Born waas 't lètste tentfiës before Corona… Gelukkig bleef Mörge Geit Baeter!? ok nao Corona aktief. Zoe zuusse mâr: Mörge geit Baeter 🙂 

Beejkomend jaorliks uitje vorme de wiënfiëste in Bernkastel (DL). Mâr ze zien ok te vinge tiëdes gezellige kepelletreffes die door gans Limburg waere georganiseerd.

Beej eur opgave woor vermeld det d'r 'n unieke s(w)amewerking plaats ging vinge tösse de kepelle/hermeniekes oët Z(j)wame. Op 3 september deilde dees club via Facebook 'n joeksig en vuülbelovend filmke.

De begeleidende teks meldde 't volgende: Zjwamer Joekskepellen Kiek Mer, Aan Dae Reem en Zaate Hermenie Nepomik trekken same nao 't LKZH 2025 Maasbree! Volgt geur os op waeg nao 22 November 2025?

Schoën wie ze in Z(j)wame (Swalmen) de muzikale heng inein slaon. Oët 't filmke bliekt wal det we meugelik 'n bizôngere mix van muziek kinne verwachte op 't LKZH. En det allemaol ônger de creatieve naam Träötallica. Komt det zeen!!

Joekskapel Kloëte Kook (Grubbenvorst) is opgerich in oktoëber 1986. De kapel is ôntstaon oët viëf zoegenaamde "randgroepjongere" die in opdrach van bureau HALT iets zinnigs môste doön mèt eure tiëd, in plaats van rotzooi make in 't dörp. 

Ein groët deil van de kapel kin nag stiëds gèn noët laeze, mâr Joeks is d’r altiéd. Dus ok zônger note wuurt d'r volop geNOTE... 

Taegewoordig moge ze zich 'n ech "dörps-ikoon" neume en zien ze nimmer weg te dinke oët 't Grubbevorster Gekkemaondaags gebeure.

Die wilt ge neet misse mèt 't LKZH... kepel nummer 9, Kloëte Kook oët Gröbbevors.

Ömdet Zaate Hermenie Neet te Blaoze oët Obbeeg (Obbicht) in 2023 aan 't langste ing (eind) trok iëdes 't LKZH, moge zeej dit jaor 't bal eupene op zaoterdig 22 november in Bree. Eur thema haet get mèt diere van doön, det zalse good begriëpe asse beejgevoegd filmke bekieks. 't Waar namelik 'n BIËSTig good optreje in 2023. Det beloof dus 'n spetterende eupening te waere op 22-11 tösse alle ziëbiëste (zeedieren) in 't MFA in Bree. 

Uiteraard duit dees kapel neet mei um de priëze.